دائم الدين انڍڙ، مفتي: مشهور عالم دين ۽ جماعت اسلاميءَ جو مرڪزي اڳواڻ مفتي دائم الدين انڍڙ 21 آگسٽ 1938ع تي ڳوٺ ستابي انڍڙ، تعلقي پني عاقل ۾ ڄائو. ابتدائي تعليم پنهنجي ڳوٺ ۾، سنڌي فائنل قبي جامي لڳ رستم ضلعي شڪارپور مان پاس ڪيائين. ديني ۽ عربي تعليم دارالهدى ٺيڙهيءَ ۾ پڙهيو، جتان فارغ التحصيل ٿيڻ بعد ٺيڙهيءَ ۾ ئي مفتي رشيد احمد لڌيانويءَ سان گڏ نائب مفتي ٿي رهيو، بعد ۾ اتي ئي مفتيءَ جي منصب تي وڃي رسيو. 1961ع ۾ ’مدرسي اشاعة العلوم ڪنڊياري‘ ۽ 1963ع ۾ منصوره ۾ مدرس ٿيو. منصوره ۾ قيام دوران جماعت اسلاميءَ ۾ شامل ٿيو، 1970ع ۾ ضلعي سکر جو امير، 1980ع ۾ سنڌ صوبي جو نائب امير ۽ جنرل سيڪريٽري مقرر ٿيو. اهڙيءَ طرح کيس جماعت اسلاميءَ جي مرڪزي مجلس شورى جو تاحيات ميمبر مقرر ڪيو ويو. مفتي دائم الدين انڍڙ ڪجھه وقت جميعت علماءِ سنڌ ۾ به رهيو، رابطه المدارس، العربيه جو 15 سالن تائين صدر به ٿي رهيو. هن 1985ع ۾ پني عاقل ريلوي اسٽيشن لڳ ڊاڪ بنگلي ويجھو درسگاهه دارالعلوم قائم ڪئي، جنهن ۾ ديني ۽ دنياوي تعليم ڏني وڃي ٿي. مفتي دائم الدين انڍڙ کي جماعت اسلاميءَ پاران پني عاقل ۽ لکيءَ جي صوبائي اسيمبليءَ جي نشتن لاءِ اميدوار طور پڻ بيهاريو ويو هو. هن پنهنجي زندگيءَ ۾ ڪيترائي ڪتاب تحرير ڪيا. مفتي دائم الدين انڍڙ پهرين جنوري 2004ع تي وفات ڪئي، سندس مزار بگي شير ۾ آهي.
1938.08.21 عيسوي
مشهور عالم دين ۽ جماعت اسلاميءَ جو مرڪزي اڳواڻ مفتي دائم الدين انڍڙ 21 آگسٽ 1938ع تي ڳوٺ ستابي انڍڙ، تعلقي پني عاقل ۾ ڄائو.
2004.01.01 عيسوي
مفتي دائم الدين انڍڙ پهرين جنوري 2004ع تي وفات ڪئي، سندس مزار بگي شير ۾ آهي.